Со помош на дронови што летаат на големи височини, се собира ѓубрето кое алпинистите го оставаат зад себе, празни боци со кислород, остатоци од храна, скршени скали и слично, пишува „Блумберг“ и додава дека од март до мај на овој начин е собран еден тон отпад.
Ѓубрето од планината го носат и шерпасите, кои можат да пренесат и до 20 килограми по лице, а за време на последната сезона на чистење на планината имаа поддршка од дроновите, кои истата рута ја завршуваат за само шест минути.
Извор: odrzime.rs
Дроновите се стационирани во Камп 1 на Монт Еверест, на 6.065 метри надморска височина, околу 700 метри под базниот камп, а се користат и за доставување залихи до базите.
Меѓу средината на април и средината на мај, дроновите со кои управува компанијата Airlift Technology со седиште во Непал, собрале повеќе од 280 килограми отпад, според податоците на Комитетот за контрола на загадувањето Сагарматa, локална непрофитна организација која што го координира собирањето ѓубре на Еверест.
Како што се наведува, користењето дронови може не само да го забрза процесот на чистење на планината, туку и значително да го намали ризикот за шерпасите кои претходно морале да го носат контаминираниот отпад надолу по опасниот врв.
Проблемот со ѓубрето на Монт Еверест е најизразен кај камповите на поголема надморска височина, кои се особено тешки за чистење поради логистичките пречки за пристап до нив.
Од 2019 година, непалската војска и шерпасите заеднички работат на отстранување на повеќе од 100 тони отпад од планината и неколку околни врвови. Во последната деценија, владата воведе и правила според кои секој планинар што се искачува над базниот камп мора да врати назад најмалку осум килограми отпад, или во спротивно ризикува да го загуби депозитот од 4.000 долари што сите посетители на планината мораат да го платат.
Се наведува и дека климатските промени дополнително ја зголемуваат итноста за чистење на Монт Еверест – снегот и мразот се топат, откривајќи отпад стар со децении кој може да ги загадува водните текови што се формираат од тој отпад и се спуштаат до селата подолу.
Со цел да се намалат ризиците од ширење болести преку човечки отпад, како колера, локалните власти минатата година воведоа прописи кои ги обврзуваат планинарите отпадот да го чуваат во специјални кеси.
Во исто време, растечките температури го прават собирањето отпад уште поопасно – мразот ослабнува, пукнатините се шират, а стопената вода во глечерот Кумбу, кој се простира меѓу базниот камп и Камп 1, предизвикува побрзо уривање на ледени блокови.
Кинеските дронови, од кои секој чини околу 70.000 долари, можат да летаат на температури до минус 20 степени и да издржат брзина на ветер поголема од 40 километри на час.
Сепак, постојат ограничувања – дроновите не можат да стигнат до повисоките кампови, каде воздухот е премногу разреден за летање, а временските услови се многу понестабилни.
Извор: odrzime.rs
